6 एप्रिल 2019 — बिर जोंसार बर'
खोनायाखै नामा ?
आंनि जोनोमगिरि
आंखौ खांगिरि-बागिरि
मोस्रोम-मोज्लाय जोसि-जोसि
आंखौ आलो-आलो दाव बिदै बायदि
अनसि-अनसि बायसि-बायसि
जोथोन लागिरि?
हब्रा-हब्रा गाबज्रि हरदोंलै आं आइयै
मानो नों सेङाखै
मानो नों फिन्नाय होआखै
आइयैलै आं दै गांदों
थरथिंसे दै लाबो होन्दोंलै
नों बिमानि थोबसे आं दै लोंनो लुबैदों
आइयैलै.... आइयैलै
फिसा होन्नानै आंखौ बावगारलांबाय नामा?
आइयैलै.... आइयै ;
बिखा गेजेराव बिमानि सावगारि लाना
गोरबोआव अनजालिनि सावगारि बजबना
मोदै रुफु-रुफु गाबनानै दै बिदों
बर' बिमानि गोदै रावजों
न' फिसा दैआ लोंदो होन्नानै बुंजानो लुबैदों
आलाय-सिलाय अरनबारियाव
सिबाय.......!
खास्रि-बिस्रि गुलि गावजानानै दं
जिउआ बारग'लांहां-बारग'लांहां
हारियाबो नाख्रेबजालांहां
गावजों गाव गुलाय गुजाय जालायहां
मा होन्नानै बुरखाय बावनो
मा राहायै दैखौ हैबावनो
मोनलोङासै जोहोलावा
आलाय-सिलाय थैलांबाय
बिमानि थरथिंसे दै मोनलोंनो दाहा थालांबाय।
