दाहा दं आइयै नोंहा
©बिर जोंसार बर' |
फिसाखौ जोनोम होनानै
फिसाखौ खांनानै
फिसाखौ बानानै
नोंहा अन्नाय दं आइयै
नोंहा दाहा दं
नोंहा सान्नाय दं आइयै
नोंहा बिमा जाना बुजिनाय दं,
आंनि फिसाया मा जालांगोन
आंनि फिसाफोरा मा मावहैगोन
आंनि फिसाफोरा माबोरै संसार जालांगोन
आंनि फिसाफोरा माबोरै गावखौ गसंथानो हाहैगोन!
फिसानि गांनाय उखैनायखौ नों मिथिगौ आइयै
आंबो बिखौ गोरबोजों बुजिगौ
नों जे फिसाखौ मा मावजानो लुबैदों
आं बिखौ मिथिगौ आइयै
नोंदि गावनि बिमाखौ अनखांनो हास्थायदों
गावनि फिसाफोरखौ आथिङाव गसंथानो लुबैदों
गावनि न'खर दाजानो लुबैदों ,
मालायनि न'खरआव थाबोलाजे
बेसेबांदि सै-सै इनाय-अनागारि खालाम जायो
जों बिखौ बयबो मिथियो
गावनि न'आ मोजांब्लाबो गाज्रिब्लाबो
गिजि-गब्लं उखुमनिब्लाबो
बे देरायाव बेसेबांदि गोजोन्नाय दं
मालायनि न'आव बे बायदि गोजोन्नायखौ जों मोना।
बर'हा गावनि असे न'खर दंमोन
राज्यो दंमोन,राजा दंमोन
दिनैसिमबो न'खरआ दंमोन
मा होन्नानै फोरमायबावनो आइयै!
बिखा गावो, खुगा गेवा
माखासे आब्रा फिसा आइयै नोंनि
सानासै नोंखौ बिमा होन्नानै गावनि
थेवबो जों जुजिदों आइयै
बिखा फोरदान्नानै उदांस्रिनि दावहायाव
जों ओंखारबोदों हाजार, लाक सुथुरनि गेजेराव
बिर दैमालु, सोमदोन जोहोलावमोननि गोहो लाना
बर'नि बिफा बड'फानि सानस्रि आरो सान्थौखौ लाना
नों बिमानि गोथार अन्नाय आरो बोरखौ लाना
गावनि आलादा न'खर बड'लेण्ड राज्यो सोरजिनो
दागाबसै आइयै दागाबसै
दखना रुबैजों मोदै हुगारै-हुगारै नों दागाबसै ।