1952 माइथायनि 16 नबेम्बर सान खालि
जोनोम जादोंमोन बर'नि आयना;
निदान ,खैदां-खैफोद सौसि सौसि
जोनोम जानाय उननि समावनो
नाजाबोदों बिमानि रावखौ फोथांनो
दिनैसिम बर' राव गेवलांथों मोन्थोरखौ लाना।
रोजा रोजा सुबुंजों राव रायजानाय
जों बर' सुबुं माहारिनि अनगायैबो गुबुनजों मिथि जानाय
बिनो जोंनि बर' राव
बेसेबांदि गोदै आंगो बिमानि राव।
नाथाय दखरसे गोरबोआव दाहा थाबाय
जाय राव, हांखो थुनलाइखौ फोथांनो
सान हर गावनि गांनाय उखैनायखौ मिथिया जासे
नाजाबोदोंमोन, जुजिबोदोंमोन
बैसोर माखासे गेदेमाया मुंख्लं जानांबाय।
हे गेदेमा मुंख्लंफोर.......!
हारिया सिनायथि जादोंमोन नोंसिनि मुङावनो
गोमालांनांबाय नोंसोर
हारिआ आखाइ-आथिं राखांहांनाय समावनो।
मा होन्नानै नोंसोरखौ गाबज्रि हरबावनो
दिनैनि बे गोथार सानाव
गैया आखायाव मुनि,मुगथा नोंसोरखौ गोजोन होनो
खालिबोल' सिबिनो रोंसै जों मुंख्लं खाम्फायाव
बिबार माला होना धुप-धुना सावना आलारि बाथि फोजोंना
हे मुंख्लंफोर दाहा थाबाय गोरबोआव
नोंसिनि सान्स्रि आरो गोथार मुङा
थुनलाइ मुलुगाव सनानि हांखोजों
अराय जोंसार जाना थागोन ।
आवगायलांफिनगोन जों गादान इयुन जोलैआ
बर' राव गेवलांथों मोन्थोरखौ लाना
हे गेदेमा मुंख्लंफोर नोंसिनि गोथार सानस्रिखौ लाना।
बर' राव गेवलांथों
बर'थुनलाइ थांना थाथों
जै बर' हारिनि।
