हाग्रामा महिलारीजों लोगोसे माखासे दैदेनगिरिफोरआ हिमन्त बिश्व शर्मानि माया जालनिफ्राय थाबैनो मुगथि मोन्थों : अबंलावरिनिसिम आर'ज ।
लिरगिरि : बिर जोंसार बर'
बर' हारिनि दानि थासारिखौ नायब्ला नुनो मोनो दायो बर' हारिया ICU हस्फितालाव दं । जों मिथिगौ हाग्रामा बिथाङाबो हारिनि फारसे सान्नाय गैद्रायै नङा थारैनो बिनावबो सान्नाय दंमोन । राजखान्थियाव आखाय होफ्लांनानै दायो बिथाङा हिमन्त बिश्व शर्मा एबा राजखान्थिनि माया जालजों जोबख्लोबजानानै दं बिखौ 100% जों मिथिगौ जेरै रामायन, महाभारत, हनुमान बिसोरनि सिरियाल फोराव नायब्ला नुनो मोनो जे रायकस, राबन उसुरफोरनि माया जालजों खोबजाना जेखौ उसुर थिनो बिखौनो मावो गावनि मानसियानो गावनिखौ उल्था सुथुरनि नोजोरजों नायो आरो गावनि मानसिजोंनो दावहा नाङो उसुरफोरा ग्लाब-ग्लाब मिनियो थिक बिदियैनो जों बर'हारिनि थासारि दा बे समाव राजखान्थिनि माया जालजों खोबजाना गावजों गाव एना एनि गुबुन हारिजों मिनि जागासिनो आरो गादब जागासिनो । माया जालजों जे गावदि खोबजानानै दं बिथाङा गाव बिखौ दाबो हमदां हायाखै जे बर' हारिया दायो जोबस्रांनायनि लामायाव दं । जाय गथ'आ जोनोम मोन्दोंमोन बर' बिमानि गोरबोआव आलो-आलो । जोनोम जाखांनायनि उनाव हाग्रामानि खर' मेलेम गोरबो इसिंआवबो हमदांनो हादोंमोन जे जोंनि हारि आंनि हारिया गुबुनजों नासयजानाय गादब जानाय आंनि बर' बिमाया आलाय सिलाय जानांनाय। जायनि जाहोनाव हाग्रामा महिलारीआबो गाव हारिनि रैखाथि थामोन्था आरो मोन्थायखौ संरैखाथिहोनो थाखाय बिखा फोरदाननानै बै समाव सिलायनि गुलिफोरखौ अरना समायखिरा लादोंमोन आरो जुजिबोदोंमोन बिथांनि गोसोआव बैफोर दाबो रोखा-रोखा बिखा बिख्लोसिङाव दं होन्नानै आं फोथायो ।
50 बोसोर सिगां आं जोनोम मोनै बै समनिफ्रायनो बर'आ दिनैसिम गाव हादर गावनि राज्यो गावनि नखर दानो थाखाय सोमावसारबोदों जुजिबोदों ।भारत उदांश्रीनि सिगांआव 1854 इं माइथायाव बर' राइजोआ गोमानानै थानायनि उनाव बर'फोरनि राज्यो जानाया जोबोद आलाइ-सिलाइ गाज्रि हालोद जालांबायमोन । गावनि थामोन्था आरो सिनायथि रैखाथिनि खोथाखौ सान्नानै 1928-29 इं माइथायाव सायमन कमिसननो आसाम कचारी जुवक सन्मिलननि मुंजों जादब काक्लारिमोननि दैदेन्नायाव गाहायाव होनाय दाबिफोरनि सायाव गांसे गोसोखांलाइ गथायदोंमोन –
1. बृटिस खुंनाय भारतारि फायखि हानजायाव बर' रेजिमेन्ट दानाय ( Raising of Bodo Regiment in British (INDIAN) Army)
2. आसाम हालामारि हायुं आरो ओनसोलारि आफादफोराव थागिबि माहारिनि थाखाय थिखानाय मासि दोन्नाय।
3. बर' माहारिखौ सुबुं सानखो फारिलाइ आरो बिसायख'थि फारिलाइआव हिन्दु मुङै थिस'ना लासे बड' मुङै थिसन्नाय।
जारिमिनाव अरायबो बर' माहारिया उदाङै राज्यो जोबोनायलाय मालायनि आथिंसिङाव जेब्लायबो थाबोनो हायाखै । भारत हादरआ उदांश्री मोन्नाय लोगो लोगो बै समाव आसामनि हाजोआव राज्यो जाबोनाय थागिबि माहारिनि सुबुंफोरा गाव-गावनि हारिनि रैखाथि, थामोन्था आरो जौगाथायनि थाखाय आलादा हादर सोरजिनो सोमावसारदोंमोन आरो बे बिथिङाव जाफुंसारबो जादोंमोन। आसामनि हायेनाव जिउखांनाय बर'फोरजों लोगोसे गुबुन थागिबि माहारिफोराबो बे बिथिङाव उनफिन्नानै थायाखैमोन। 1933 मायथाइआव आसाम थ्रायबेल लिग, 1952 मायथाइआव बड' साहित्य सभा, 1953 माइथायाव आसाम थ्रायबेल लिगखौ सिफायना दुलाराय आसाम ट्राइबेल संघ माहारिफोरनि बायदि बिथिङाव रैखाथि, थामोन्था आरो जौगासारनाय लाबोदोंमोन ।
नाथाय गुबुन-गुबुन राजखान्थि हान्जाफोरनि फाव फान्दायनायाव थागिबि माहारिफोरखौ दैदेनग्रा दैदेनगिरिफोरा आन्दायनो गोनां जादोंमोन। जावोनाव थागिबि माहारिफोरा आबै-आबौनिफ्राय मोन्नाय हा, हारिमु दोरों आरो जारिमिनआ लासैयैनो मोस्लेदजालांनो हमबायमोन। दैदेनगिरिफोरनि बेले-बेजे आरो खौसेथि गोयैखौ नुनानै बर' आरो गुबुन थागिबि माहारिनि सरासनस्रा सुबुंफोरा गाव-गावनि राव थुनलाइ आरो सिनायथिखौ लासैयैनो खोमानो लाबायमोन। थाखो बोरोन बासियालासे बर' माहारिनि गेजेराव मोनसे गोख्रों आफादनि हास्थायनाया बांनायनिफ्राय बांनो हमदोंमोन।
बे बायदि थासारियावनो जेब्ला भारतनि गाहाइ मन्थ्रि इन्दिरा गान्धीया 1967 मायथाइयाव All Party Hills Leaders Conference नि सिगांआव आसामखौ दाफामफिन्नाय जागोन होन्नानै फोसावनाय जादोंमोन । बे खाबुखौ लानानैनो बर'माहारिनि बै समनि माखासे गोसो गुदुं लेखा गोरों दाद जांगिला जोहोलावफोरा 1967 मायथाइनि 15 फेब्रुवारीयाव क'क्राझारनि ट्राइबेल रेष्ट हाउसआव दुलाराय बर फरायसा आफादखौ जोनोम होदोंमोन । जोनोम होखांनायनि उनाव लोगो-लोगोयैनो गाहाइ मन्थ्रिनि आसामखौ दाफामफिन्नो फोसावनायखौ गोसो गोरबोजों बरायबाय होन्नानै फोसावदोंमोन । गायसनजेन्नायनिफ्रायनो दुलाराय बर फरायसा आफादआ मा हाबाफारि, मावथांखि आरो नोजोर लाना हाबा मावबोखो बेखौ राज्यो राजाफोरा बिखौ बयबो गाहामैनो मिथिजोबखायो ।
जोनोम जाखांनायनि उनाव दुलाराय बर फरायसा आफादआ फरायसा आफादनि महरैल' आफाद जानानै थायाखै गाव हारिनि रैखाथि थामोन्था आरो मोन्थायखौ रैखाथि होनो हारिनि सिनस्रि महरै दाबोनो दं। 1967 इं माइथायनिफ्राय 1986 मायथाइसिम दुलाराय बर फरायसा आफादआ बर' माहारिनि सोलोंथाइ, समाजखान्थि, रांखान्थि आरो बायदि बायदि बिथिङाव जौगाखांनाय दाफामलु हाबाफारि लाना थाद'नाय गोयै हाबा मावबोदों । लोगोसे बड' साहित्य सभा, PTCA आरो गुबुन आफादफोरनि लाइमोन गोहो महरै गोगोमै हाबा मावबोखादों। नाथाय बर'फोरनि राजखान्थियारी आफाद आरो बिनि दैदेनगिरिफोरनि गुबुंले बिफाव लानायखौ नोजोर बोनानै सम आरो थासारिनि सरसोमनायाव माहारिनि राजखान्थियारी थामोन्थानि जांख्रिथायआवबो बारसोमनो गोनां जादोंमोन ।
1986 मायथाइयाव बड'फा उपेन्द्रनाथ ब्रह्मखौ दुलाराय बर फरायसा आफादनि आफादगिरि महरै सायख'नाय जायो सायख'नायनिफ्राय बर' माहारिनि जारिमिनाव मोनसे गोदान दिंग्राय बेन्दो सोमजिदोंमोन। बिथां आफादगिरि मासि आजावखांनायनि उनावनो बर' आरो हायेननि गुबुन थागिबि माहारिफोरनि रैखाथि थामोन्था जौगासारनायनि थाखाय राजखान्थियारी दाबिखौ लानानै सोमावसारनायखौ जागायदोंमोन। बिथाङा 92 नं दफा दाबि रनसायना बै समनि आसामनि गिबि मन्थ्रि मुस्रि फ्रपुल्ल महन्तनो गथायदोंमोन। बे दाबिखौ बर' माहारिनि जांख्रिथायनि जारिमिनाव 92 Character of Demand होन्नानै गुवारै मिथिनाय जायो। बे दाबिनि सायाव सरखारा जेबो राहा लायैनि जाहोनाव बड'फा उपेन्द्रनाथ ब्रह्मआ बै समनि धुबुरी जिल्लानि बासबारियाव 18 निफ्राय 22 फेब्रुवारी 1987 मायथाइनि बोसोरसालिया जथुम्मायाव 92 दफा दाबिखौ स्र' खालामना गथायै मोन्थाम दाबियाव महर होदोंमोन । दाबिफोरा जाबाय—
1. बुर्लुंबुथुरनि सा सेरफाङाव बड'लेण्ड मुंनि आलादा राज्यो सोरजिनाय ।
2. बुर्लुंबुथुरनि खोला सेरफाङाव थानाय बर' आरो गुबुन थागिबि माहारिफोरनि रैखाथि आरो जौगाथायनि अट'नमास कावोनचिल।
3. कार्बि आंलं अट'नमास काउन्सिलनि सिङाव राज्यो जानाय बर' फोरनो ST(H) फारिलाइआव सोसननाय ।
बड'फा उपेन्द्रनाथ ब्रह्मआ गिबि खेबनि थाखाय बर' माहारिनि आलादा राज्यो दाबिनायखौ "बड'लेण्ड " बिमुं होजेन्दोंमोन बिखौ जों रोखा रोखायै मिथिगौ। बड'फा उपेन्द्रनाथ ब्रह्मआ 1987 मायथाइनि 2 मार्चआव आलादा राज्यो बड'लेण्ड सोमावसारनायखौ जागायजेन्नाय समाव बर' माहारिनि गेजेराव जेरैबो बिथिंनिफ्राइ गुलाइ-गुजाय, गावजों-गाव एना-एनि, फोथायलायनाय गैयै बायदि सौसिख'हायै जेंनाजों मोगा-मोगि जाना दङ'मोन। गुबुन फारसेथिं आसाम सरकारजों लोगोसे गुबुन दावगाखानाय माहारिफोरनि सोबख'लु नोजोरजों जेरैबो बिथिङाव नाख्रेबनाय। नाथाय जायनि फोथायनाया गोख्रों बेजों अर, बार रावबो थावरिनो हाया बेखौ फोरमान होनानै बड'फानि दैदेन्नायाव एबसुनि सोमावसारनाया गोख्रों महर लादोंमोन। सोमावसारनायखौ जेरैबो बिथिंनिफ्राइ गोख्रों खालामनो थाखाय BPAC, VF, ABEF, AATWWF बायदि बायदि आफाद जोनोम होनो गोनां जादोंमोन। सोमावसारनायाव खुंगिरिफोरनि बोलो आरो हारसाफोरनि खैसारि आरो दबथायनायाव सुजित नार्जारीखौ (12 जुन 1987) जागायनानै द' बोसोराव गासै 1135 सुबुंफोरा मुंख्लं जानाङो, माखासेआ जिनाहारी जानाङो आरो रोजा रोजा न' बां सावजानायजों बेंगुरा जानाङो। बर'नि थांनानै थानांगौनि जुजिनायनि गोथां जारिमिन बड'लेण्ड सोमावसारनाय। गोहो बोलोआ जायनि मुलुगआ बिनि होन्नाय बायदि संबिजित, सुबुंदारा, सुबुं मोन्थाय जेबो खामानि होआखिसै। रोजो रोजा बर फिसाफोरा जेल जानांबाय नाथाय जोंखौ बुथारग्रा आरो जोंनि न' सावग्राफोरा जेबो साजा मोनाखिसै, बिनो जोंनि गादबजानाय, बहा थांखो सुबुंदारा ? बहा थांखो थार बिजिरनाय? नाथाइ दुखुनांथावसिन बिखा गावनाय जाथाया जाबाय बड'लेण्ड सोमावसारबोनाया 1990 इं माइथायनि 1 मेआव बिफा गोमा जाबाय। बड'फाया सासे आगोमा फिसामोन फरायसायैनो सानसुमै, इयुन नोजोर गोनां आगोमा बर' फिसा । बिथांनि अब'थिरा गोमानायाव गोसोम जोमैखौ होखारनो मानाव गेदेर सानसुमा खुंगुर बैसोमुथियारी बिथाङा एबसुनि आफादगिरि जायो आरो बड'लेण्ड सोमावसारनायनि दैदेनगिरिनी बिबान लायो आरो बिथांनि दैदेननायनि उनाव 1993 मायथाइनि 20 फेब्रुवारी आव गिबि BODO ACCORD आ जानानै थाङो ।
नै बर' हारिफोर, हादर खुंगिरिफोरा जोंखौ माहारिनि नोजोरजों नङा नोगोरारिनि नोजोरजोंसो नायो, जायनि थाखाय BAC आ जोंनि बिनायजों सोमोन्दो गोयै मोनसे खुंथाय जोनोम जादोंमोन। दैदेनगिरिफोरा इयुनखौ नायनानै जिरायथ'नायनि थांखिजों BAC खौ लाथ'दोंमोन नाथाय बिखौनो खाबु लानानै जौगा मेलेमगिरि सुबुंफोरा माहारिखौ बोखावबाय। बिदा-फंबायनि गेजेराव गावस्रा होबाय आरो गावजों-गाव एना-एनि सोमजि होबाय। नाथाय एबसुआ गावनि थांखिखौ दान्दिसे समबो बाउवाखैमोन ।
1996 इं माइथाया दुलाराय बर फरायसा आफादनि जारिमिनाव मोनसे गोसोखांथाव बोसोर जानानै थालांबाय। बे बोसोरावनो नैथि खोलोब आलादा राज्यो बड'लेण्डनि सोमावसारनायखौ जागायफिन्नाय जादोंमोन। लोगोसे सेथि बर' गोरोबथानि गेजेरजों सोरजिजानाय BAC खुंथायखौ नेवसिगारनानै मोनसे गोदान थिउरिया हानजा BLT आबो 1996 मायथाइआवनो जोनोम जादोंमोन। हरखाबै गोख्रों जाबोनो हमनाय आलादा राज्यो दानायनि सोमावसारनायखौ बोजबनानै लानो हायै माखासे थिउरियाफोरा 30 जुलाइ 1996 मायथाइआव दुलाराय बर फरायसा आफादनि बै समनि आफादगिरि आरो सासे राफोद दैदेनगिरि जोहोलाव सोमब्ला बसुमतारीखौ गावथारनानै मुंख्लं खालाम लाङो । बिथांनि थैनाय सानखौ बे बोसोरनिफ्रायनो " उदखारि बेरेखा सान " महरै फालिबोबाय थानाय जादों। बे बोसोरावनो राजखान्थियारीफोरनि फाव फान्दायनायाव बर' आरो सान्थालफोरनि गेजेराव मोनसे गिख्रंथाव दावराव-दावसि जानानै मोन्नैबो हारिनि 200 नि बांसिन सुबुंफोरा जिउ खोमानो गोनां जादोंमोन आरो 3 लाकनिबो बारा सुबुंफोरा न' बां गारना राहा बादायाव थानो गोनां जादोंमोन।
बे बायदि मोनसेनि उनाव मोनसे गिदित अल'कदनि समाव मानगोनां दानि RS नि बारग' MP मुस्रि उर्खाव गोरा ब्रह्म बिथांखौ दुलाराय बर फरायसा आफादनि आफादगिरि महरै गिलिर बिबानखौ जाबसिन्नानै होनाय जायो । बिथां दैदेनगिरि लाखांनायनि उनावनो BPAC, ABWWF, ABEF बायदि आफादफोरखौ दाफामफिन्ना बड'लेण्ड सोमावसारबोनायखौ गोख्रोंनिफ्राय गोख्रोंसिन खालामनायजों लोगोसे हारियारि दाङाबाजिनि अरखौ सुखुमोरना गोजोन थासारि लाबोनो नाजानाय जादोंमोन। गोलाव सम एबसुआ सुबुंदारा खान्थिजों गोख्रोङै सोमावसारदोंमोन आरो गुबुन फारसेथिं BLT आ बे रोखोमसे दाबिफोरखौनो लानानै हाथियारनि गोख्रों रोन नांदोंमोन। बिजाउनाव बड'लेण्ड मोनसे गोब्राब थासारि सोमजिखांदोंमोन। 1999 मायथाइयाव BLT आ दावहा दोन्थनाय सुगथियाव सागान होनानै थामख'ना गोजोन सावरायनायाव बाहागो लादोंमोन। BLT हानजानि दाबिफोरा ABSU नि दाबिफोरजों एखे रोखोमनि जानायलाय बड'लेण्ड ओनसोलाव गोजोन थासारि लाबोफिन्नायनि थांखिजों थामख'नायारि गोजोन सावरायनायखौ मदद होनो थांखि लानाय जायो। BLT नि गोजोन सावरायनायखौ सुबुंदारा खान्थि मदद होलांनानै मोनसे ओंथिगोनां फोजोबनाय लाबोनो थाखाय गुबुन गुबुन हारि माहारिनि आफाद आरो दैदेनगिरिफोरखौ लानानै CCBM मुंनि मोनसे गोख्रों आफाद दानाय जादोंमोन। फिथाइ महरै 2003 मायथाइनि 10 फेब्रुवारीआव BLT जों नैथि बड' गोरोबथाखौ सागान होना बड'लेण्ड हायुङारि खुंथाय (BTC) सोरजिनाय जायो। गोजोन थासारि लाबोफिन्नाय आरो मोस्लेर जालांनाय जौगानायनि थासारिखौ जिउ मोनखांहोफिननो दुलाराय बर फरायसा आफादआ नैथि बर' गोरोबथाखौ गोसो गोरबोजों बरायना आलादा हादर बड'लेण्ड सोमावसारबोनायखौ दोन्थ'नो थांखि लानाय जादोंमोन। मोनसे थिउरिया हान्जानि सोमावसारनायखौ ओंथिगोनाङै फोजोबहैनायाव हेफाजाब होखांनायनि उनाव दुलाराय बर फरायसा आफादआ 2005 मायथाइआव NDFB आ फोसावनाय दावहा दोन्थनायखौ बरायनो थांखि लानाय जायो । थांखि आजावना लानायनि उनाव गोबां खेब सावरायनायनि गेजेरजों दुलाराय बर फरायसा आफादआ NDFB दैदेनगिरिफोरखौ आलादा हादरनि दाबिफोरखौ सोलायना भारत संबिजिदनि सिङाव आलादा हादरसा सोरजिनायनि दाबिखौ गनायना लानो खावलाय जादोंमोन। खावलायनाय लेखा बिथांमोननि मानगोनां दैदेनगिरिफोरा थांखि आरो नोजोरखौ गोरोबहोलायना सोमावसारलांनो रादाय खानायलाय थांनाय माखासे बोसोराव NDFB आरो ABSU आ जयैनो मोनसे गोख्रों सोमावसारनायाव आगान होफिननो हादों।
राजखान्थिनि बेले-बेजे आरो बिदा-फंबायनि नारा-नाथार : —
सिगां समाव जाबोनाय बायदि जारिमिनआ फिन जाफिनबावबाय। बर' गोरोबथानि उनाव बड'लेण्ड हायुङारि खुंथायखौ खुंनो थाखाय राइजो राजाफोरनि लुबैनाय बायदि एबसु आरो BLT ज' जानानै BPPF मुंनि मोनसे राजखान्थि हान्जा दानानै होनाय जादोंमोन। नाथाय दैदेनगिरिफोरनि गोसो गोरोबलायै आरो एना एनिनि जाउनाव बे राजखान्थि हान्जाया जोनोम जाग्रोमोना गावस्रानानै खावनै जादोंमोन। बे एना एनिनि जाउनाव दुखुनांथाव रोखोमै 2007 मायथाइनिफ्राइ 2010 मायथाइसिम 200 सो बर' सुबुंफोरा जिउ खोमानो गोनां जादोंमोन । बे गिख्रंथाव थासारिनि अरखौ खोमोरना गोजोन थासारि सोमजि होनो दुलाराय बर फरायसा आफादआ भारत आरो आसाम सरकारखौ नारसिन्नायजों लोगोसे गुबुन-गुबुन आफाद, हानजा सुबुंफोरजों सावरायदोंमोन। गोब्राब नाजानायनि गेजेरजों दुलाराय बर फरायसा आफादआ गोजोन थासारि लाबोफिन्नायाव गोगोमै बिहोमा होनो हादों होन्नानै आं फोथायो ।
बड'लेण्ड सोमावसारनाय आरो BTC :— आं गोबांथार बुंनो सानलिया मानोना जों बांसिनआनो जारिमिनखौ मिथियै नङा मिथिजोबगौ । नोंथांमोना मिथिगौ गोलाव सम गोब्राब सोमावसारनायनि उनाव BTC खौ बर' आरो गुबुन थागिबि माहारिफोरनि हा, राव, हारिमु, सिनायथि बायदिखौ गोख्रों रैखाथि होनायजों लोगोसे ओनसोलाव गोख्रोङै सोरगिदिं जौगानाय लाबोनो दाफुंनाय जादोंमोन । BTC मोनफुंनायनि उनाव साफ्रोमबो बर' फिसाफोरजों लोगोसे दुलाराय बर फरायसा आफादनि मावथि आरो दैदेनगिरिफोरनि थै आरो गोलोमदै नांथाबफानानै दङ' । BTC गोरोबथाया बर' फिसाफोरनि गोसो गोरबोजों बजबजानाय एबा बाखनायजानाय मोनसे जारिमिनारि गोरोबथा । दिनैबो दुलाराय बर फरायसा आफादआ BTC खौ गोसो गोरबोजों बरायो आरो अरायबो सोबख'जानाय ,गादबजानाय आरो नेवसिजानाय निखाउरी सुबुंफोरनि गोजोर जौगानायनि हाबाफारि एबा मावथांखि लाजानो लुबैयो ।
नाथाय दुलाराय बर फरायसा आफादआ माहारिनि थाखाय मोनसे आलादा हादोरसा सोरजिनायनि गोथार सिमांखौ मोगथाङाव जाफुंसार होनो थाखाय रादाय होनायखौ बावगारलांनो माब्लाबाबो हाया । BTC जों लोगोसे बेनि बायजोआव थानाय बर' आरो गुबुन थागिबि माहारिफोरनो जेरैबो बिथिंनिफ्राइ रैखाथि गोनां मोनसे आलादा नखर सोरजिनायनि सतबांसाखौ दुलाराय बर फरायसा आफादआ आद्रि खालामनो हाया । जाउनाव दिनै आलादा हादर " बड'लेण्ड " सोरजिनायनि जोबथा सोमावसारनायाव बारसोमनो बिखा फोरदाननानै गावखौनो बावसोमथाबनानै दिनैनि बे समाव जानिजि खाफ्रादों ।
कलमनि बोहैथिखौ फोजोबैनि सिगां आं बिखौनो मानगोनां दानि राजखान्थि गोहोआव थानाय बिथांमोनखौ बुंनो सानदोंदि सिगां सारियाव बुंबोनाय बायदि रामायन, महाभारत, हनुमान लिल्ला बिसोरनि सिरियालफोराव नाथक दान्नाय बायदि राबन, उसुर फोरजों जेब्ला कार्तिक, गनेश मोनहा दावहा नांनो थाङोमोन अब्ला माया जालजों आन्दाय होजानानै जेखौ उसुरफोरा मावनो, खालामनो थिनो थिक बिदिनो मोजांखा मानसिया उसुर थिन्नाय बायदि गावनि सुबुंजोंनो माया जालाव थाना दावहा नांनाङो । जेरै बैफोर सिरियाल बायदि एरै बर' हारिनि थासारि आंनि गोसो गोरबोआव एखे-एखे मोनदांदों बिनिखायनो आं हाग्रामा महिलारिजों लोगोसे माखासे दैदेनगिरिफोरखौ राजखान्थिनि माया जालजों खोबजाना दं होन्नानै बुंदों। जायनि जाहोनाव मानगोनां हाग्रामा महिलारि बिथाङा गावनि आथिङाव गावनो रुवा दान्नो थांगासिनो नुखा, मिथिखा गुबुन हारिफोरनो राजखान्थिनि मुलाम्फायाव ST होनो थाखाय मोनड' गुबुन हारिजों हेफाजाब होगासिनो आरो होनो थांगासिनो (बिनो माया जालाव गोग्लैदों) लोगोसे गाव हारि माहारिनि बेरेखा महरै बयनिबो नोजोराव गोग्लैजानानै दं बिखौ बुजियाखै । दा बे समाव बिथांमोना मोनड' हारिनो ST होयोब्ला खहा जाया खहा जाया होननानै बुंबाय थादों नाथाय माब्रै खहा जाया ? बिथांमोना नुवाखै मिथियाखै नामा थाखानाय एसटिफोरनि थाखाय साख्रि बाख्रिफोरनि जेबो खाबुवानो गैया, साख्रि बाख्रि बिफोरखौ बार हो उदैनि गुन्दैआनो BPL, APL फोरा रान्नो थांगासिनो । अब्ला बिथांमोना दिनै सोर? बे जौगाखानाय हारि माहारिनो जुदि ST होयो अब्ला मा जाहैगोन इयुन बर' हारि थाखानाय एसटि फोरा ? ओरैनोब्लाबो बर' हारिया दिनैसिम जेबो जौगाखांनाय गैया ना फरायसालि,ना बिजाब जेरावबो हाख'राव फबजानाय थारैनो बिथांमोनहा हारि माहारिनि सोरगिदिं जौगाखांनाय मोजां थासारि मोजां हाबा मावग्रा ना गोरिब गुनद्रानि सोबख'नानै जाग्रा? खबरदार जोहोलावफोर एसे बुजिनो नाजा जुदि मोनड' हारिया बर'आ आलादा नखर जायैनि सिगां एसटि जायो अब्ला नोंसोर गाव हारिनि सिनस्रिखौ बुफायनानै लाबाय बियो रोखा जागोन । बिथांमोननो एसटि होबा आं मोनड' हारिनिफ्राय भट मोनगोन सानदों नामा? मोना माब्लाबाबो मोना, जुदि एसटि जामारबाय दे गाव बर' हारिनिफ्राय मोनगोन सान्दों नामा ? माब्लाबाबो मोन्नाय नङा, अब्ला सान्दो दिनै नों बबे जेयाव नांनानै दं ओरैबो जाया हरैबो जाया नाव गंनैआव नाव जावनाय जाहैगोन । दायो अब्ला नों गावखौनो बुथारनायनि लामायाव लांगासिनो सानसे थैसै समाव रावजोंबो आय' होनजानाय नङा नोंथांमोना । हिमन्त बिश्व शर्मानि राजखान्थिनि गिदिर माया जालाव नोंथांमोना नांनानै दं बियो रोखा रोखा फोरमान जागासिनो दं थाबैनो बे माया जालनिफ्राय रैखा मोन्नो नोंसोर नाजाफिनाब्ला आरो नोंसोर बुहुमाव गैला 100 जौखोन्दो फोरमान जाहैगोन ।
दुखुनांथाव बिखा गावथाव गोसो गोरबो बायग्लियो दिनै नोंथांमोना जायनि थाखाय रोजा-रोजा बर' जोहोलावफोरा थैनांबाय, आयजो माहारिया खास्रि बिस्रि जिनाहारी खालामजानांबाय ,न' बां जायनि थाखाय सावजाबोनांबाय बुख्रुब जाबोनांबाय बर' हारिनि आलादा नखर " बड'लेण्ड " सोरजिनो थाखाय दिनै नोंथांमोना हरखाबै "बड'लेण्ड " राज्योनि हेंथा जाफैबाय । मा जाफैखो दिनैनि बे समाव , आरोबाव फिन बिदा-फंबाय गावस्रा फैबावबाय । गाव हारि माहारिनि जेबो सान्नाय गैला बुजिनाय गैला गुबुन हारिनि थाखायसो दिनै सोमावसारफिनबाय ,गोदो बै समाव सोरनि थाखायथो खुगायाव सिलाय गुलि अरनानै समायखिरा लाना सोमावसारबोखोमोन ? थांखिया बेनोखामोन नामा आं गाव हारिखौ गादबना गुबुन हारिखौ फोजौखांनाय? नङामोन बिदि नङामोन थारैनो नोंसोर राजखान्थिनि माया जालजों खाथे जाजोबबाय जायनि जाउनाव बिदा फंबायजों नोंसोर गोरोबनो हालिया आखाय फायखन्नानै बिखा फुवारब्लाबो नोंसोर फैलिया । थांनाय बोसोराव जेब्ला सनितपुर जिल्लानि सिङाव थानाय बाथासिफुरनि बानासुर फोथाराव मिरु दुलाराय बर फरायसा आफादनि गलदेन जुबुलि जथुमा खुंबा बर' हारिनि गेजेराव खौसेथिखौ हास्थायनानै नोंथांमोनखौ लिंहरदोंमोन होन्नानै मिथिनो मोन्दों नाथाय नोंथांमोना नुजा हैयाखिसै । थारैनो नोंसोर बिदा फंबायनि गेजेराव खौसेथि होन्नाय सोदोबखौ जानो गोसो गैलिया नामा ?
गाव हारि खौसेथि गोयै बर' हारिनि थासारि सोरगिदिं बिथिंफोरखौ नायबिजिरनानै नायोब्ला नुनो मोनो दायो बर' माहारिया बेमार जाना ICU हसफितालावसो थैहां बरपहां जानानै दं। जाय डकतरा बे बेमारखौ फाहामनो हागोन बिनो गाव हारिनि गेजेराव खौसेथि जानानै " बड'लेण्ड " राज्यो सोरजिनाय नङाब्ला आरो बर' हारिया गेरेमसा महरै थांनानै थानांगौआ बुहुमाव गोब्राबसै दा " बड'लेण्ड" आनो बर' हारिनि थाखाय अक्सिजेन जानानै दं बियो फोरमान जायो ।
खोमाजों खोनादों मिथिनोबो मोन्दों BPF हानजायाबो खौसेथिखौ हास्थायो आरो बड'लेण्ड बिग्रा माखासे हानजायाबो खौसेथिखौ बिदा फंबायनि गेजेराव हास्थायो नाथाय बिदा आरो फंबायनि गेजेराव बे मोन्नै हानजाया खौसे जानो हायाखै माब्रै ? BPF हानजाया बै समाव बड'लेण्डनि थाखाय थैनो बायदि फाग्लामोन नाथाय दिनै समाव बड'लेण्डखौ नाङा होनग्रासो जाबाय अब्ला बिथांमोनजों बड'लेण्ड बिग्रा हानजाया बोरै खौसेथि जानो हालायखो बिसोरथ' माब्लाबाबो जानो हाया जाय हान्जाया थै थां हारिनि हाबा मावगासिनो ? BPF हानजाया बे समाव खर' गंग्लायनांसिगौनि समा जाबाय गावनि गोरोन्थिखौ गाव सिमान लानांगौनि दिना सौफैबाय । बिनिखायनो आं BPF हानजाखौ बारे बारे बुंबाय थादों दिनै बड'लेण्ड नाङा होन्नाय सोदोबनि ओंथिखौ आं बुजि मोन्नानै दायो नोंसोर हिमन्त बिश्व शर्मा एबा राजखान्थिनि माया जालजों आन्दाय होजाबाय होन्नानै बुंदों, बे जालजों नोंसोर दिनै गाव हारिनि गेजेराव बिदा फंबाय गोरोबै थासारिया सोमजिदों बिखौ नोंसोर दिनै मुगथि मोन्नो थाखाय फार्टि थारथि, एना एनि जाय सरखारजों दं बिखौ ज्राब गारनानै (जालदाब आसाम सरकारखौ नागारना फैब्लानो नोंसोर मुगथि मोनबाय आसाम सरकार थेर बेथेर बायबाय) गाव हारि माहारिनि थाखाय खौसेयै बिदा फंबाय नों दानागार आं दानागार अनज्लायनायनि गेजेरजों बिखाजों बिखा गोबा लायनानै बड'लेण्ड राज्योखौ सोरजिनानै फैदो सनानि नखर मुलुगाव रुजु-रुमु खुंलांनोसै, बिनिखायनो नोंथांमोनखौ आं आर'ज गाबदों मानगोनां हाग्रामा महिलारीजों लोगोसे माखासे दैदेनगिरिफोरआ हिमन्त बिश्व शर्मानि माया जालनिफ्राय थाबैनो मुगथि मोन्थों ,,,,मुगथि मोन्थों नोंथांमोननि खुगायाव गोसो गोरबो इसिं बिखा बिख्लोआव बड'लेण्डनि गोदै सोदोबा ओंखारफिन्थों । जै बर' हारिनि,, जै बर' बिमानि, जै बड'लेण्डनि, जै बर' हारि खौसेथिनि । एसेनोसै गोजोन्थों।
ना:गो: हेफाजाब लानाय बिजाब : मानगोनां दानि मिरु दुलाराय बर फरायसा आफादनि आफादगिरि सार प्रमद बर'नि 2017 इं माइथायनि गावनि आफादगिरि बिबुंसारनिफ्राय हेफाजाब लानाय जादों ।
